Dalja nga bllokada me Bullgarinë është në dialog, mendon Mickoski
Kryeministri Kristian Mickoski mendon se dalja nga bllokada me Bullgarinë duhet të kërkohet përmes dialogut dhe pret që bisedimet të vazhdojnë, me afrim të qëndrimeve dhe arritje kompromisi.
Duke iu përgjigjur një pyetjeje gazetareske se ku sheh zgjidhjen pas deklaratave se nuk do të ketë rinegocim dhe ndryshime kushtetuese me efekt të shtyrë, Mickoski tha se gëzohet që dialogu ka filluar dhe që partnerët ndërkombëtarë janë të njohur me të.
"Kjo është bukuria e demokracisë — të bisedosh kur ke qëndrime të ndryshme, dhe aftësia në demokraci është kur ato qëndrime të ndryshme i afron dhe në fund arrin në kompromis. Unë pres që dialogu të vazhdojë të zhvillohet dhe në një moment të afrohen qëndrimet dhe të arrijmë në zgjidhje", deklaroi Mickoski nga Kalaja e Shkupit, ku mori pjesë në inspektimin e aktiviteteve përfundimtare për rindërtimin dhe vënien në funksion të dy objekteve muzeale.
Kur u pyet nëse paralajmërohet një takim i ri para samitit të dhjetorit, kryeministri nuk tregoi një datë konkrete.
"Procesi të ecë në mënyrë natyrale. Për gjithçka që duhet të dijë publiku, do të dijë në kohë", tha ai.
Kur u pyet nëse ka marrë këshilla shtesë për vazhdimin e bisedimeve, Mickoski u përgjigj se këshilla ishte të fillojë dialogu.
"Këshilla ishte të fillojë dialogu. Dialogu ka filluar. Partnerët tanë janë të njohur me përmbajtjen e dialogut. Pres që dialogu të vazhdojë, kështu që, kur të ketë përparim, natyrisht që publiku do të informohet", deklaroi kryeministri.
