Filipçe për Mickoskin: E di që të është e vështirë, të mungon edhe mentori i dytë nga Serbia

Kryetari i LSDM-së, Venko Filipçe, i dërgoi një mesazh kryeministrit Kristian Mickoski se gradualisht po humb sistemin e tij të mbështetjes nga Serbia dhe se do të duhet të përgjigjet për pyetje lidhur me transferimet financiare, marrëveshjet bankare dhe dyshimet e tjera për të cilat, siç theksoi, do të kërkohen përgjigje edhe para institucioneve evropiane.

„Unë e di që tani për ty nuk është e lehtë, mungon edhe mentori i dytë. Ai sistem mbështetës nga Serbia ngadalë po humbet dhe do të mbetesh vetëm. Lind pyetja se çfarë do të bësh? Me siguri do të duhet të përgjigjesh për pyetje jo vetëm këtu, por edhe në vende të tjera“, tha Filipçe në seancën parlamentare të dedikuar për pyetjet deputetare.

„Ashtu siç qartë dhe pa ekuivok, shumë brutalisht, siç do të thoshe ti, në mënyrë të fuqishme, tha kryetarja e Komisionit Evropian Ursula fon der Lajen se para Evropës do të duhet të përgjigjesh, para Prokurorisë Evropiane dhe prokurores evropiane Laura Koveshi“, theksoi Filipçe.

Kryetari i LSDM-së ngriti pyetje edhe për rrjedhat financiare lidhur me Hungarinë dhe Serbinë, si dhe për bankën Alta, duke theksuar se ekzistojnë informacione për transferime të mundshme parash nga Serbia në Maqedoni.

„Do të hapen pyetje për paratë kineze nga Hungaria, për bankën Alta, për atë nëse me të vërtetë, siç kemi gjithnjë e më shumë informacione, ka transferim parash nga Serbia këtu. Disa dokumente i pashë para disa ditësh. Nëse është kështu, mua më vjen kështu njerëzisht keq për ty, të them të drejtën, jo politikisht, por rrugën e zgjedh vetë. Me siguri do të përgjigjesh edhe për transferimin e drogës përmes kufirit, atëherë në ato institucione nuk do të mund të ketë më shpërqendrim dhe të jepen informacione të rreme“, deklaroi Filipçe.