Minçev dhe Jagxhiu nënshkruan memorandum bashkëpunimi: Lidhim njohuritë dhe përvojën për shërbime publike më cilësore
Forcimi i bashkëpunimit bilateral, shkëmbimi i njohurive ekspertësh dhe praktikave të mira dhe përmirësimi i kapaciteteve profesionale të institucioneve ishin në fokus të takimit bilateral mes ministrit të administratës publike, Goran Minçev, dhe ministrit të dixhitalizimit dhe administratës publike të Republikës së Kosovës, Lulezon Jagxhiu.
Takimi, i mbajtur në margjinat e konferencës ndërkombëtare „Kosova PAR 2026“ në Prishtinë, rezultoi me nënshkrimin e një Memorandumi Bashkëpunimi, i cili hap hapësirë për një partneritet më konkret mes dy ministrive.
Të dy ministrat theksuan rëndësinë e krijimit të komunikimit institucional të drejtpërdrejtë dhe lidhjes së kapaciteteve ekspertësh, me qëllim që njohuritë e shkëmbyera të përkthehen në zgjidhje të zbatueshme.
„Bashkëpunimi ndërmjet institucioneve ka vlerë të vërtetë kur njohuritë ndahen, përvoja shndërrohet në zgjidhje konkrete, dhe përfitimet i ndiejnë qytetarët. Besoj se Maqedonia dhe Kosova kanë hapësirë për një partneritet edhe më të ngushtë, përmes të cilit do të shkëmbejmë praktikat e suksesshme, do të mësojmë nga njëri-tjetri dhe do të hapim mundësi të reja për avancim profesional. Qëllimi ynë janë institucione që punojnë më efikas, veprojnë profesionalisht dhe u ofrojnë qytetarëve shërbime më cilësore“ theksoi ministri Minçev.
Me Memorandumin e nënshkruar parashikohet që bashkëpunimi të zhvillohet përmes trajnimeve të përbashkëta, shkëmbimit të ekspertëve dhe trajnerëve, zhvillimit të programeve për përmirësimin e aftësive profesionale dhe menaxheriale. Hapësirë shtesë për bashkëpunim hapet në menaxhimin e burimeve njerëzore, si dhe përmes projekteve të përbashkëta dhe iniciativave rajonale.
Me këtë partneritet, Maqedonia dhe Kosova konfirmojnë angazhimin për ndërtimin e lidhjeve institucionale më të forta dhe ndarjen e njohurive në interes të funksionimit më cilësor të administratës publike. Sepse vlera e vërtetë e bashkëpunimit ndërinstitucional matet përmes përfitimeve konkrete për qytetarët, shërbimeve në kohë, qëndrimit profesional dhe procedurave më të thjeshta, më efikase.
