Nga nesër nën lupën e „Qytetit të Sigurt" edhe drejtuesit në Ohër, Strugë, Kërçovë dhe Dibër
Sistemi për mbikëqyrje të trafikut „Qyteti i Sigurt" nga nesër, 12 tetor, do të fillojë të funksionojë edhe në Ohër, Strugë, Kërçovë dhe Dibër, njofton Ministria e Punëve të Brendshme.
Nga MPB njoftojnë se pas përfundimit të kontrolleve teknike dhe testimeve përfundimtare, kamerat do të vendosen në funksion në rrugët e rajonit të Sektorit për Punë të Brendshme Ohër.
Me aktivizimin e sistemit pritet një kontroll më i fuqishëm dhe i vazhdueshëm në trafikun rrugor, zbulim më i shpejtë i shkeljeve, disiplinë më e madhe tek drejtuesit dhe përmirësim i sigurisë në rrugë.
Nga MPB bëjnë apel drejtuesve të automjeteve që të respektojnë rregullat dhe ligjet e trafikut dhe me sjellje të përgjegjshme të kontribuojnë për siguri më të madhe.
„Qyteti i Sigurt" është në funksion që nga 1 shkurt i këtij viti, dhe në periudhën fillestare qytetarët janë informuar për shkeljet, ndërsa sistemi është testuar dhe përmirësuar.
Sipas informacioneve që ndau ministri i Punëve të Brendshme gjatë vizitës së fundit në Ohër, numri i të lënduarve në aksidentet rrugore këtë vit është ulur për 20 për qind krahasuar me të njëjtën periudhë të vitit të kaluar, respektivisht ka pasur 34 viktima më pak.
