Pas çdo femicidi dëgjojmë të njëjtat premtime, Biljana, Rosica, Katja, sa të tjera nevojiten për përgjegjësi institucionale: të dielën protestë nga iniciativa „Asnjë më shumë“
Iniciativa joformale „Asnjë më shumë!“ e përbërë nga një grup aktiviste dhe aktivistë, organizon një protestë kundër femicideve, dhunës institucionale dhe pandëshkueshmërisë të dielën (08.11), me fillim në orën 12:00, në parkun „Gruaja Luftëtare“ në Shkup.
Sipas aktivistëve të kësaj iniciative, rasti i fundit i femicidit në Bogdanci ku u vra 17-vjeçarja Biljana Kiriq nga partneri i saj përsëri tregoi mosveprim institucional, jo-profesionalizëm, pakujdesi, reagime të dobëta dhe të vonuara dhe asnjë mbrojtje për gratë dhe vajzat në shtetin tonë.
„Biljana është një vajzë 17 vjeçe. Ka denoncuar dhunë dhe kërcënime për jetën. Janë marrë masa mbrojtëse. Sot ajo është e vdekur.
Ramajana, Rosica, Tankica, Ivana, Katja, Biljana. Sa emra të tjerë duhet të mësojmë që institucionet të fillojnë të marrin përgjegjësinë e tyre?
Pas çdo femicidi dëgjojmë të njëjtat premtime, të njëjtat justifikime dhe të njëjtat njoftime institucionale. Gratë vazhdojnë të vriten“.
Nga aty shtojnë se shteti që nuk arrin të mbrojë gratë nga dhuna njëkohësisht fshin gjininë, barazinë gjinore dhe seksualitetin nga ligjet dhe politikat.
„Në vend të mbrojtjes dhe përgjegjësisë, marrim llogari politike me barazinë gjinore dhe heshtje.
Nuk pranojmë që mosveprimi institucional të normalizohet, as që vrasjet e grave të trajtohen si tragjedi të izoluara dhe drama dashurie“.
Marshi protestues, sipas njoftimit, do të fillojë nga parku „Gruaja Luftëtare“, do të vazhdojë pranë Kuvendit dhe Ministrisë së Drejtësisë dhe do të përfundojë para Ministrisë së Arsimit dhe Shkencës.
„Nuk kërkojmë mëshirë. Kërkojmë përgjegjësi. Kërkojmë: 1. Hetim të plotë dhe transparent për vrasjen e Biljanës dhe përgjegjësi për çdo dështim institucional. Publiku duhet të dijë: kush ka vepruar, kush nuk ka vepruar dhe pse mungoi mbrojtja.
2. Dorëzimin urgjent të ndryshimeve të paketës së ligjeve dhe miratimin e ndryshimeve në Ligjin për parandalimin dhe mbrojtjen nga dhuna ndaj grave dhe dhuna në familje të dorëzuara në Kuvend në gusht. Mjaft me mbajtjen e ndryshimeve ligjore në sirtar ndërsa gratë paguajnë me jetën e tyre.
3. Rikthimin urgjent të termit gjini në të gjitha ligjet, udhëzimet dhe programet nga të cilat është fshirë. Fshirja e fjalës nuk fshin dhunën bazuar në gjini – përkundrazi, e dobëson luftën kundër saj.
4. Shpalljen nga funksionet publike dhe pozicionet drejtuese të të gjithë atyre që bëjnë thirrje për kontroll mbi gratë, justifikojnë ose normalizojnë dhunën ndaj tyre. Me paratë tona nuk duhet të paguhen ata që minojnë sigurinë dhe lirinë tonë.
Partitë politike kanë kanalet dhe mekanizmat e tyre institucionalë – le t’i përdorin për të përmbushur kërkesat tona. Kjo protestë është qytetare dhe nuk është hapësirë për promovim partiak. Përfaqësuesit partiakë, simbolet, flamujt dhe paraqitjet nuk janë të mirëpritura“.
