Promovohet platforma „EkoShkupi“: Qytetarët do të mund të raportojnë më lehtë problemet mjedisore
Sot u promovua platforma „EkoShkupi“, një zgjidhje e re digjitale me të cilën qytetarët do të raportojnë më lehtë problemet mjedisore, ndërsa shërbimet komunale do të marrin informacione konkrete për veprime më të organizuara, njoftoi kryetari i komunës, Orce Gjorgjievski.
„Një ide rinore bëhet realitet, në shërbim të qytetit tonë. Si funksionon „EkoShkupi“? Kur vëreni një deponi të egër, problem me kontejnerin ose ndonjë problem tjetër mjedisor, përmes platformës dërgoni një raport me vendndodhje të saktë, fotografi dhe një përshkrim të shkurtër. Kështu, shërbimet do të gjejnë më lehtë vendin dhe do të kenë një pamje më të qartë të situatës në terren. Pas dorëzimit, mund të ndiqni statusin e raportit. Për qytetarët kjo do të thotë raportim më i lehtë, më shumë transparencë në veprime dhe komunikim më të drejtpërdrejtë me institucionet“, tha Gjorgjievski.
Për ne, shtoi ai, kjo është një detyrë shtesë për përgjegjësi dhe rezultate të dukshme.
„Teknologjia na jep një mundësi të re, dhe përkushtimi ynë duhet ta shndërrojë atë në një Shkup më të pastër dhe më të rregullt. Falënderim i sinqertë Bashkimit Evropian për mbështetjen financiare, LEAD-it, dhe veçanërisht të riut Andrej dhe gjithë ekipit të entuziastëve që me njohuri, punë dhe besim në idenë e tyre krijuan „EkoShkupi““, tha kryetari i komunës.
Ai i ftoi qytetarët të përdorin platformën dhe me vendndodhje të sakta, fotografi dhe informacione të dobishme të kontribuojnë për gjetjen më të shpejtë të problemeve.
