(Video) U rrëzua një avion luftarak rus
Një avion luftarak rus Su-30 u rrëzua sot gjatë një fluturimi stërvitor në rajonin e Kaliningradit, konfirmoi Ministria ruse e Mbrojtjes, transmeton gazeta kroate "Index".
Aksidenti ndodhi në enklavën ruse në Detin Baltik, që kufizohet me Poloninë dhe Lituaninë.
Sipas Ministrisë ruse të Mbrojtjes, ekuipazhi arriti të katapultohej, pas së cilës u evakuua nga një ekip shpëtimi. Ministria nuk ka bërë të ditur shkakun e rrëzimit, as nëse pilotët janë plagosur.
Kanali Telegram "Mash", i njohur si i afërt me Kremlinin, njoftoi se avioni u rrëzua pranë qytetit Çernjahovsk, rreth 90 kilometra në lindje të Kaliningradit. Sipas të njëjtit burim, të dy pilotët janë plagosur dhe janë transferuar në një spital ushtarak.
Su-30 është një avion luftarak shumëfunksional me dy vende, i destinuar për sulme ndaj objektivave në ajër dhe në tokë. Autoritetet ruse njoftuan se avioni nuk mbante armatim në momentin e aksidentit.
Në shtator, në rajonin Amur u rrëzua edhe një avion rus Tu-95, ku humbën jetën gjashtë anëtarë të ekuipazhit, ndërsa një tjetër u plagos, njoftoi agjencia Interfax më 29 shtator, duke u thirrur në informacionet e konfirmuara nga Ministria ruse e Mbrojtjes.
Ngjarja ndodh në një periudhë tensioni të shtuar midis Rusisë dhe NATO-s rreth Kaliningradit. Ministri lituanez i Punëve të Brendshme, Martinas Katelinas, kërkoi vendosjen e forcave shtesë ushtarake në kufirin me enklavën ruse.
