Mickoski në Gjermani: Diaspora është pjesë e pandashme e atdheut
Diaspora maqedonase është pjesë e pandashme e atdheut, theksoi kryeministri dhe kryetari i VMRO-DPMNE-së, Hristijan Mickoski, në Konferencën e Tretë të komiteteve jashtë vendit të partisë, që u mbajt në Solingen, Gjermani.
Në konferencë morën pjesë edhe anëtarët e Komitetit Ekzekutiv të VMRO-DPMNE-së, Aleksandar Nikoloski, Timço Mucunski dhe Stefan Andonovski, njoftojnë nga partia.
Gjatë fjalimit para delegatëve, Mickoski prezantoi gjendjen në shtet, treguesit ekonomikë, të cilët i vlerësoi si tregues të rritjes, projektet infrastrukturore, si dhe masat për përballimin e sfidave në sektorin e energjetikës të shkaktuara nga ngjarjet globale.
Duke folur për pozicionin ndërkombëtar të shtetit, ai theksoi se Maqedonia është bërë një shtet për respekt, i cili mbron qëndrimet e tij me argumente, mesazhe të qarta dhe strategji.
Gjendja aktuale e shtetit, sipas Mickoskit, është pasojë e gabimeve të së kaluarës, të cilat i vlerësoi si "të rënda si male".
Ai theksoi gjithashtu se VMRO-DPMNE ka mbështetjen më të madhe bindëse nga qytetarët, me një avantazh më të madh se mbështetja e të gjithë aktorëve të tjerë politikë së bashku.
Në konferencë u hapën edhe çështje për përmirësimin e komunikimit midis diasporës maqedonase dhe atdheut, si dhe për mundësitë e investimit dhe kthimit në Maqedoni.
Mickoski që nga dje ndodhet në një vizitë pune në landin Renani Verior-Vestfali në Gjermani. Sipas njoftimeve nga shërbimi i shtypit të qeverisë, në kuadër të vizitës janë parashikuar takime në nivel të lartë politik, si dhe biseda me përfaqësues të kompanive, institucioneve dhe komunitetit të biznesit.
Është parashikuar që kryeministri të marrë pjesë edhe në samitin e parë "Më të fortë së bashku – rezistenca si imperativ për tërë shoqërinë", ku do të marrë pjesë në panel-diskutimin "Nga ndryshimet globale te realitetet rajonale".
